政情：「自家」針灸瘦面 陳李妮滿意
貪靚係女士嘅天性，亞姐冠軍出身嘅博愛醫院副主席陳李妮（Lily）最近迷上做針灸美容，事關佢原本想調理身體而幫襯博愛中醫針灸服務，做咗幾次後身體已漸入佳境。有次醫師主動問佢做唔做美容針灸，聲稱可以瘦面兼令皮膚緊緻。Lily一聽到可以變靚啲，梗係即刻試吓，結果只做咗三次，已經好滿意效果喎！
早前Lily同博愛醫院主席譚姜美珠（Winnie）相約開餐，一講起中醫療效就停唔到口，因為Winnie嘅丈夫譚立仁都係知名中醫，Lily不時搵佢把吓脈。今年Lily做博愛轄下醫療服務委員會主席，主要睇住中醫及牙科服務，所以有機會就要試吓自家中醫服務，估唔到有意外驚喜。
博愛年底將喺何文田開設第四間中醫教研中心，提供中醫及針灸服務，除咗惠及各區市民，亦可畀中醫畢業生有多啲臨牀實習機會，一舉兩得。