政情：李卓人踩九西 泛民攬炒
明年立法會選舉直選，因應人口分布改變，原本有七個議席嘅香港島，要減少一個議席，並轉移畀九龍西。俗語有話「多個香爐多隻鬼」，新增呢個議席自然引來多方爭逐。據聞除咗今屆僅敗嘅民協有意捲土重來，連工黨都考慮緊力爭呢區，其中有機會由現任新界西議員李卓人轉戰九龍西，但喺咁多泛民黨派爭逐之下，隨時兩敗俱傷分薄票源，甚至攬住一齊死，到時建制派真係要講聲多謝。
今屆僅敗 民協或捲土重來
按現時形勢，九龍西五個立法會議席，三個屬泛民（獨立黃毓民、公民黨、民主黨），兩個屬建制（民建聯、經民聯），泛民連同民協，四個黨派合共取得十四萬三千票，建制派就只得八萬二千票，比例係六成四對三成六，算係泛民咁多個選區中，比例最懸殊嘅一區。故此當政府宣布九龍西加多一席，好容易就聯想到，係由今屆選舉僅輸四千票嘅民協攞到最後一席，話唔定譚國僑捲土重來參選都未定。
政圈消息話，泛民同建制黨派都對呢個新增議席蠢蠢欲動。建制派中，民建聯有傳想派多一隊出戰，今屆被勸退嘅工聯會亦有意重返戰埸，自由黨亦傳有意參選。至於泛民方面，有工黨中人話，佢哋立黨之時，曾經講過希望每個立法會選區都有一席，現時佢哋只喺港島、新界東及新界西有議席，加上工黨都打算派人選九龍西嘅區議會選舉，相信到立法會選舉時，都有地區樁腳幫手。
捲捐款醜聞 工黨勢遇狙擊
據聞工黨其中一個可以考慮出戰九龍西嘅人選就係李卓人，皆因佢有「知名度」喎，而佢哋亦試過今屆空降張超雄去新界東，最終勝選，所以都唔係冇機會喎。不過，以總票數計，泛民攞到四席係正常，五席就真係太進取。如果泛民「貪勝不知輸」，分票太平均，最後隨時益咗建制派，屆時就喊都無謂。
再者，工黨面對收取壹傳媒集團前主席黎智英捐款醜聞拖累，到時一定被建制派狙擊，一個唔好聽，影響晒成個泛民都有之。