中環出更：國泰機取消 樹根提早返港投票
立法會房屋事務委員會尋日朝早開會討論係咪引用《立法會（權力及特權）條例》（特權法）調查「鉛水」事件，最後僅以兩票之差被否決。本身係委員會成員嘅鍾樹根前晚去咗韓國，原本打算尋日下午先返香港，有人就打電話畀身在韓國嘅樹根叫佢提早返港投票反對議案。
冇得拜訪韓國會
不過，原來樹根乘搭嘅國泰航空取消咗下午班機，樹根焗住要搭早機返港，順便返立法會投票反對引用特權法查「鉛水」事件。
雖然委員會會期一早定咗，但獲邀出席韓國富川電影節活動嘅樹根依然喺前晚出發去韓國，仲訂咗機票尋日下午先返港，等佢出席完頒獎禮後，尋日朝就拜訪當地國會，兼周圍遊覽一吓。
點知，國泰取消咗尋日下午班機，仲安排埋樹根搭尋日朝早八點班機返港，樹根朝早十點左右返抵本港，返立法會投埋票都夠晒時間。今次樹根被國泰影響行程，難怪樹根都話連個天都幫埋政府喎。
卓妮