中環出更：振震有詞：青年工作首重教育
原民政事務局局長曾德成及原公務員事務局局長鄧國威「被炒魷」，震撼整個官場，其中曾德成被指未做好青年工作。正競逐全國青聯副主席嘅香港青年聯會前主席霍啟剛話，香港回歸後，商界及青年組織喺促進年輕人與內地交流合作方面已經做得唔少，但是流於表面，有「旅行團化」傾向，佢認為下一步青年工作應該做得深入啲。佢希望藉着明年奧運年，通過體育為年輕人做多啲嘢。
霍啟剛倡深化中港交流
廣西百色市尋日舉行投資環境推介會，不少政商界人士去捧場。咁啱香港菁英會主席盧金榮、青年事務委員會前主席陳振彬（Bunny）及啟剛都喺度。啟剛話，青年工作範圍好廣泛，下一步大家可以做得更專業及深入，例如內地城市舉辦唔少投資簡介會，但除了推薦投資環境外，可以考慮喺律師、媒體等唔同專業領域作進一步交流，並且提供多啲實習機會畀港青。
盧金榮：需關注上樓問題
盧金榮就話，菁英會啱啱帶咗數十名港青到天津實習，嚟緊仍會舉辦深圳前海以及廣東省實習團。佢仲認為，政府真係要關注吓年輕人搵工難、人工低及上唔到樓嘅問題。Bunny就話，青年工作細水長流，需要由教育及德育做起，早啲將正確的價值觀注入教學中，而唔係後期再做修補工作，佢直言政府應拿出政治決心。
香港回歸後首任民政事務局局長藍鴻震都有到場，佢由九七年做到二○○○年退休。雖然當時仍未推行問責制，但佢認為青年工作首要係教育，其次先係民政。同場仲有立法會議員梁志祥，提起民建聯即將訪問北京，撞啱特區兩位問責局長突然換班，佢坦言擔心焦點會被轉移，唔排除到時會與國家領導人提及有關話題。
卓妮