中央電視台曾訪問內地觀眾：「你幸福嗎？」結果笑話百出，有人唔識回答，有人答非所問。如果將同樣嘅題目訪問香港長者，又會得到咩答案呢？相信同內地差唔多嘅咋，香港安老政策天殘地缺，好多長者老無所依，晚景淒涼，又點可能幸福吖。
呢，中大老年學研究所按照「全球長者生活關注指數」嘅計算方法，評估香港長者生活質素，喺全球九十七個國家及地區中，香港排名二十四。學者係咁講嘅，香港整體表現優良，其中健康狀況及有利環境都位列十名之內，但收入保障、心理健康及社會關係嘅指標就低於整體平均值。
即係咁，呢項排名係咪真正反映香港長者嘅生活質素，見仁見智，唯一可以肯定嘅係，香港作為一個富裕地區，到依家都未有一套完整嘅安老政策，導致老人問題日益惡化，貧窮長者不斷增加，絕對係一種羞恥及悲哀。
數字顯示，香港貧窮長者接近三十萬人，佔大約三成，即係話三個長者之中就有一個生活喺貧窮線下。由於缺乏退休保障，好多基層長者臨老唔過得世，要靠執紙皮幫補生計，有位八十二歲老人家仲要做小巴司機維生，結果喺悶熱嘅車廂內焗斃，講起都淒涼。試諗吓，西方先進國家會唔會出現呢啲情況吖？難為香港仲被評為全球第六富裕地區添，直情係不知所謂，受之有愧。
歸根究柢，香港老人問題之所以不斷惡化，皆因港府涼薄，港產官僚開口老有所養，埋口老有所依，實際上將長者當成財政負擔，推得就推。例如全民退休保障制度咁吖，係人都知可以有效解決老人問題，令基層打工仔無後顧之憂，而由港府委託嘅學者團隊去年亦已提交研究報告，建議推行全民老年金，點知當局拖拖拉拉，依家仲係無聲無息。日前立法會一個委員會討論全民退保問題，當局至話年底會進行公眾諮詢喎。其實正如有人話齋，全民退保前後講咗十幾年，早就有社會共識，仲使乜諮詢吖。
明日復明日，明日何其多，所謂諮詢無非又係玩拖字訣啫。眾所周知，港府施政一向議而不決，決而不行，諮詢之後仲要研究，研究之後可能仲要諮詢，係咁不斷蹉跎，全民退保隨時要拖多幾年都似，簡直難過登月。
嗱，咪話功夫茶唔提醒吖，隨着人口老化加劇，老人問題只會愈來愈嚴重，十幾廿年之後，每四個港人就有一個長者，當局仲係唔嗲唔吊，等到老人問題爆煲，咁就無可收拾嘅喇！