政情：公民講場：臨別秋波「照」鬧爆貪湯

話咁快，廉政公署副廉政專員兼執行處首長黃世照三年任期今日屆滿，回想三年前爆出「貪曾」前特首曾蔭權爵士嘅「貪盡海陸空、歎盡省港澳」嘅貪腐醜聞，其後「貪湯」前廉政專員湯顯明嘅醜聞亦搞到廉署立立亂，香港廉潔排名受到拖累，黃Sir臨危授命接掌執行處。黃Sir尋日同傳媒茶敍時，雖然唔肯評論貪曾同貪湯貪腐案件嘅調查進度，但不忘臨別秋波數臭貪湯，鬧貪湯的確損害廉署形象。不過，佢就力撐廉署，話一個機構嘅誠信，唔會單單因為一個人嘅行為而受到影響，又形容湯顯明事件係廉署成長嘅一部分。