中環出更：最緊要抽水 陳家洛取消開會
啟晴邨爆出鉛水風波搞到人心惶惶，各大政黨奇招盡出，不單主動為居民驗水，更加積極約見運輸及房屋局官員討論有關問題。不過，唯獨公民黨（公文袋）後知後覺，直至尋日都仍未見該黨議員約見官員，亦都無就事件採取行動，公文袋議員陳家洛反而大費周章要求財委會邀請特首創新及科技諮詢委員會顧問楊偉雄列席會議，完全失焦，結果尋日急急撤回要求，認真離譜。
財委會原定尋日加開兩小時特別會議，討論楊偉雄列席會議一事，其實今個星期已經有二十八小時會議要開，再加兩小時，好多議員都大呻辛苦兼無謂。陳家洛尋日終於知衰，主動去信要求秘書處撤回討論事項，變相取消尋日嘅特別會議，認真嘥公帑。佢直認係因為近日跨黨派議員忙於處理屋邨食水含鉛事件，向佢反映要求取消會議，而因為議員「拉布」，創新及科技局嘅撥款申請好大機會推到十月，所以請楊偉雄列席會議失去迫切性。
公文袋換時間補鑊
不過講到底，其實因為公文袋咩都未做，唯有取消會議換取時間。咁講都唔係無根據，事關尋日六小時嘅財委會完全唔見陳家洛蹤影，原來佢去咗為鉛水事件補鑊，與唔同承建商開會，而公文袋亦收集咗幾十個水辦，計劃為居民驗水，預計要五日之後有結果。
卓妮