中環出更：行行出狀元振奮人心
中學文憑試日前放榜，升學路五花八門，無論成績好壞，學生應該不愁出路，甚至可考慮投身社會。觀塘區議會主席陳振彬（Bunny）回想當年會考路艱難辛酸，為幫補家計，未等放榜已即刻搵工賺錢。Bunny經朋友介紹到製衣廠任文員，人工六百元，晚上再半工讀，佢勉勵青年人不要介意起步時職位低微，只要肯力爭上游，行行都會出狀元。
凝聚青年人嘅「青年廣場」五周年，日前大開生日慶祝派對，Bunny搞過唔少青年發展工作，當然要來捧場啦。講起會考成績，佢直言考得唔錯，可惜當年家境清貧，身為大仔嘅佢唔想加重父母擔子，呢邊考完試，翌日已在工廠返工。不過，佢無放棄升學夢，下班後在夜校進修，完成會計專業文憑課程。
捱咗四年，Bunny終儲夠二千五百元，決定自立門戶開製衣公司，至今身家數以十億計。雖然起步比別人艱難，但Bunny認為係磨練嘅好機會，寄語青年人在不同範疇尋找上位機會，不要怕辛苦。相反，在場另外幾位名人似乎比較順利，好似中華總商會會董張俊勇會考數學攞A，但佢話普遍同學就有八、九科A，佢算係水皮喎。
鄭志明鼓勵後生仔拓視野
講番個派對，現場有唔少由青年人擺設創意攤位，新世界設施管理有限公司主席鄭志明（Brian）興致勃勃逐一參觀。見到班後生仔活力十足，Brian都勉勵大家要抱開放態度接受新挑戰，不需要「讀嗰科做嗰科」。佢又鼓勵青年人多爭取機會到內地或外國工作或遊歷，擴闊視野，了解不同國家文化，趁後生承受多啲挫折，認真語重心長。
卓妮