香港時運不濟，頭頭碰着黑。政改爭拗啱啱告一段落，以為可以平靜啲喇，點知又爆出食水含鉛風波，而且愈爆愈大鑊，搞到人心惶惶，唔少市民連飲啖乾淨食水都要望天打卦，講起真係無奈。
呢，九龍灣啟晴邨食水危機仍未解除，又有兩個公共屋邨證實中招，當局喺葵聯邨四十四個食水樣本中驗出五個含鉛量超標，水泉澳邨亦有一個食水樣本超標。即係話，目前為止最少已有三個屋邨出事，衰開有條路，睇怕仲陸續有來吖。
當局為咗安撫人心，一方面安排居民驗血，一方面又強調食水含鉛超標一至兩倍不構成即時毒性，除非長期飲用，否則毋須太擔心喎。呢啲咪就係不負責任囉，居民長年累月飲用超標鉛水，點可能冇事吖，尤其細路仔受影響最大，事關日後嘅成長，家長唔擔心就假。港產官僚與其講廢話，不如盡快搵出源頭及諗辦法善後好過喇。
即係咁，今次問題究竟出喺邊個環節，係預製組件出事，定係水喉匠疏忽，仍然有待進一步調查，唯一可以肯定嘅係，當局監管不力，把關粗疏，絕對難辭其咎。尤其係醜聞曝光後，房屋署仍然聲稱食水冇問題，證明佢哋反應遲鈍。有區議員指當局危機意識不足，其實，呢啲唔止係危機意識不足嘅問題，而係責任心不足嘅問題。水係生命之源，食水安全嘅重要性係人都知，如果港產官僚有責任心，做好自己份工，又點會烏龍百出吖？當局話日後驗收新樓時會加驗食水樣本係咪含鉛及焊接物料喎，老實講吖，如果一早識得咁做，就唔使搞成咁喇。
事實證明，港產官僚渾渾噩噩，敷衍塞責，根本靠唔住。難為當局仲話要集中精力搞好經濟民生，家陣連食水安全都甩甩漏漏，所謂搞好經濟民生，純粹係大隻講咋。
正所謂，綿綿不絕，必有亂結。香港行衰運，怪事特別多，港府係咁，國泰亦係咁，呢間曾經被譽為全球最佳嘅航空公司，近年由於管理混亂，服務質素每況愈下，醜聞一單接一單。呢，尋日又發生「甩轆」事件喇，一架由本港飛往芝加哥嘅國泰客機，喺停機坪上失驚無神突然彈出緊急逃生滑梯，導致航機嚴重延誤，二百七十七名乘客受影響。今次好彩仲未起飛咋，如果喺空中發生呢啲甩轆事件，你話會有乜嘢後果呢？
所以話，一個地方嘅興衰有迹可尋。近年香港好似撞邪咁，政治方面固然烏煙瘴氣，經濟民生亦係七國咁亂，想唔沉淪都幾難！