政情：長者機械人問CY「食咗藥未」
中學文憑試今日放榜，教育局尋日宣布約四成日校考生嘅成績符合大學嘅基本入學要求，換言之，有六成考生無機會入讀大學，不過「條條大路通羅馬」，職業進修、職業教育相信都為考生提供唔同嘅出路！特首梁振英（CY）尋日特地去到香港專業教育學院參觀，了解該校同學嘅科研成果，同時鼓勵年青人考慮職業教育課程。
CY對其中一個長者智能家居服務機械人好感興趣，長者可以透過語音系統同圖案卡片，要求機械人讀報和匯報天氣，亦可提示長者日常生活嘅注意事項。CY亦親自測試機械人嘅運作，佢手持卡片指示機械人匯報當日新聞，但係機械人「左扭右扭」，唔多合作。有學生幫手示範機械人嘅提示功能，機械人望住梁振英講：「老友記，你今日食咗藥未？」場面相當逗趣。