政情：建制請願團 舉名牌博宣傳
建制派喺「鉛水風波」中後知後覺，輸咗幾條街。為咗補鑊，原本絕少向行政會議請願嘅建制派，尋日突然出現一班組合好立雜嘅稀客，當中唔少係各區疑似有意參選區議員嘅地區人士。佢哋唔止拉橫額表達訴求，仲個個舉起寫上自己姓名嘅牌合照，擺明就係乘機宣傳兼交功課，劍指年底嘅區議會選舉。
多位傳有意參戰區選
以往去行會請願嘅人多數係個人或居民協會，主打民生訴求。今次雖然拉大橫額嘅係公屋聯會，但係廿幾人之中唔少人都係有意參選區議會嘅建制派，當中有民建聯（民記）、西九新動力等，連唔受「鉛水風波」影響嘅港島東區及大埔，民記都有派支部人員現身。
當中企喺中間發言嘅，係盛傳有意參選啟晴邨新選區嘅西九新動力成員兼九龍城居民聯會啟晴邨總幹事梁婉婷，仲有傳聞有意參選屋邨長沙灣邨、單挑民協社區主任鄒穎恒嘅民記張德偉。