政情：騸雞冷手執內副
立法會議員湯家驊喺政改方案被否決後宣布退出公民黨（公文袋），仲辭埋立法會議員一職，十月生效。大家都關注湯家驊辭職後內會副主席一職會花落誰家，不過建制派對於抗爭手法愈行愈激嘅議員都唔接受，估計會喺較為溫和嘅衞生服務界議員李國麟同白鴿黨議員單仲偕（騸雞）之間二揀一。不過據聞李國麟嫌做「內副」太過困身，所以睇怕都最終都係由騸雞冷手執個熱煎堆。
內會主席梁君彥（Andrew）及湯家驊一齊開內會年結記者會，個個都好關心邊個會接替湯家驊做新「內副」。Andrew話，過去三年同湯家驊合作愉快，覺得內會都係傾程序問題，唔係政治爭拗嘅地方，由一個泛民同一個建制主持，可以建立一個好好嘅溝通模式，應該珍惜。湯家驊亦都話，「內副」必須由泛民擔任，因為可以減少不必要嘅爭拗，令議會運作有效暢順，又話泛民廿幾人一定可以搵到大家都接受嘅人選咁話。
周三周五要駐守立會候命
早前泛民「飯盒會」召集人、公文袋議員梁家傑就公開講，除咗一直喺黑名單嘅工黨議員李卓人同何秀蘭係不受建制派歡迎外嘅「內副」人選外，就連騸雞同會計界議員、公共專業聯盟嘅梁繼昌（Kenneth）都被建制派點名不接受。不過其實只係幾位建制派隨口噏下，並未拍板。
其實建制派都冇得咁揀擇，撇除拉布議員同愈走愈激嘅公文袋，佢哋亦都因為Kenneth主持人事編制小組委員會時玩嘢而對其有微言。揀來揀去，只得李國麟同騸雞係建制派可接受人選。不過據聞李國麟嫌做「內副」太過困身，周五開內會及周三開大會都要駐守立法會候命，所以睇怕都最終都係由騸雞冷手執個熱煎堆。
四法案趕搭大會「尾班車」
另外尋日內會年結就公布共有廿項政府法案提交咗畀立法會，內會成立咗十五個法案委員會審議十五條政府法案，另有四條係前日先喺最後一次大會通過，係咪成立法案委員會都要十月復會再決定喇。Andrew就再次提醒政府盡早提交法案，否則今屆立法會完結都未獲通過就會失效o架喇。