中環出更：用台灣手機 樹根當內地貨
啟晴邨近日爆發鉛水風波，揭發原來該邨單位嘅廚房及洗手間水管係使用內地預製組件。一班泛民尋日開立法會財務委員會時就借題發揮，要求政府喺工務工程當中唔好用內地材料，議員梁國雄（長毛）更懶醒咁話，成班議員有邊個會用中國手機吖！點知建制派鍾樹根就大大聲講︰「我係用中國手機！」真係估佢唔到喎。
長毛懶醒：邊個用大陸機
話說議員七嘴八舌，話內地偷工減料嚴重，促當局要加強抽查。議員陳志全亦叫有關部門喺活化沙田城門河河濱工程中，如要安裝內地照明系統要多加監察。長毛就加把口唱衰中國貨︰「呢度邊個用大陸手機吖？」佢強調唔係歧視，不過內地製品一向質素差啲。
樹根就即刻反駁，仲形容佢部手機係「自由祖國牌子、社會主義生產」咁話。卓妮事後問番樹根究竟係用邊個內地品牌手機，點知係台灣一個著名品牌手機。將台灣品牌當「中國貨」，樹根果然「政治正確」。不過佢究竟係矇查查，誤將台灣品牌當係內地品牌，定係真「愛國」呢？
卓妮