中環出更：鉛來有古講 家和慎揀水
「鉛水風波」不斷擴散，全城恐慌，尋日一眾名人出席國際金茶王大賽時大講「水經」。一般人只關心水喉水乾唔乾淨、煲滾咗未，不過對於奶茶專家香港咖啡紅茶協會主席黃家和（Simon）來講，雖然飲蒸餾水更清純，但沖奶茶就無乜味，所以唔會訂水上門飲！
Simon話，水質就好似麵包咁，有軟硬之分，香港水質屬於軟性，即係鈣質相對較低，但沖起奶茶就啱啱好。至於蒸餾水雖然清啲，但因欠缺礦物質，泡沖奶茶反而唔夠香。不過有份擔任比賽評判嘅榮源茶行太子女王詩雅話，蒸餾水最啱泡中國茶，佢話泡上等茶葉時為追求最純真嘅茶香，會揀用蒸餾水，泡出來嘅茶香零舍唔同。佢聽聞有茗茶發燒友好講究，日日跑上飛鵝山拎泉水泡茶及飲用，話飲咗身邊好啲，真係信唔信由你。
下月擬搞「奶茶車」
講番個奶茶活動，現場擺咗幾件懷舊物件展覽，包括舊式相機、點唱機及收銀機等。Simon嘅兒子黃浩鈞話，呢幾件係爸爸嘅珍藏古董，單係部相機就有八十年歷史，至今仍然郁得，擺放出嚟係等大家邊歎奶茶邊欣賞古董。
Simon話，為嚮應港府早前構思搞「美食車」，計劃用貨車改裝成奶茶車，嚟緊八月五號至九號，一連幾日巡迴全港十八區免費派奶茶，預計每日派一萬杯。奶茶車呢個搞作有啲諗頭，咁會唔會變成一盤生意？Simon話仲度緊，不過一切要睇政府係咪發牌先得。
卓妮