人心不古，社會反智，呢個世界愈來愈多行為幼稚嘅小學雞，藝人係咁，政客係咁，連堂堂國家都係咁，問你服未。
功夫茶講緊嘅咪就係南韓囉。係咁嘅，南韓爆發新沙士，全球高度戒備，香港更加一度被南韓沙士病人破門而入，搞到人心惶惶。為安全起見，港府上月向南韓發出紅色旅遊警示，本來屬於正常嘅防疫措施，點知尋日南韓突然以季節性流感高峰期為由，向香港發出藍色外遊警示，擺明玩報復啫，咁仲唔係小學雞！
正如學者話齋，邊有國家因為季節性流感而向其他國家或城市發旅警o架。冇錯嘞，南韓咁做何止係反常，簡直係反智。係人都知，季節性流感全世界都有，南韓如果真係咁驚青，不如向全球發旅警吖，笨。如果南韓同世界隔絕，老死不相往來，咪唔使擔心受到感染囉，問題係，南韓人喺國內隨時仲危險吖，新沙士點計都可怕過流感喇。
細路仔都睇得出，南韓失驚無神向香港發外遊警示，擔心流感係假，惡意報復係真。港府向南韓發紅色旅警已經超過一個月，至今未有撤銷迹象，有人老羞成怒，咪學小學雞玩報復囉。之不過咁，面係人畀，架係自己丟，南韓用咁荒謬嘅藉口發旅警，隨時報復不成，反而貽笑國際。
好心南韓政府唔好咁幼稚喇，如果有時間同精力，不如諗吓點樣盡快消除疫症仲好喇。不可不知，南韓新沙士疫情仍未消退，確診個案達到一百八十幾宗，三十六人死亡。雖然近日再無發現新患者，但依然人心惶惶，至今仍有五百多人被隔離，喺呢個危急之秋，政府應該集中精力研究對策，而唔係挑動爭端添煩添亂。尤其係作為一個國家，行事更加要光明磊落，如果心胸狹窄，搞埋啲小動作，就算搵幾多韓星拍廣告宣傳，都改善唔到南韓嘅國際形象喇。
無論點都好，香港、南韓同列亞洲四小龍，南韓近年成為港人旅遊熱點，韓風更加成為潮流時尚嘅代名詞，兩地應該加強合作，而唔係製造矛盾。講到尾，香港同南韓嘅關係一向唔錯，雖然未至於好似《藍色生死戀》咁纏綿悱惻，至少好似《來自星星的你》咁細水長流，無謂因為一場新沙士而搞到「情變」吖。
一句講晒，香港向南韓發旅警係情非得已，南韓向香港發旅警係小題大做。港府最緊要堅持原則，為市民做好防疫把關，任何政治施壓都可以當透明，南韓疫情一日未平息，旅遊警示就一日唔可以解除，知冇？