除咗衣着打扮，髮型都足以影響一個人嘅外表，好似傳聞有意參加立法會新界東議席補選嘅新界社團聯會理事長陳勇，最近就由過去嘅蛋撻頭轉咗個飛機頭新潮髮型，但原來係個意外。陳勇話，負責嘅髮型師係細佬介紹畀佢嘅，咁啱剪頭髮時瞓着咗，瞓醒時見到兩邊剷晒青，仲染咗少少啡色，直言嚇咗一跳。佢仲話，其他港區人大代表見到佢時，都笑佢應該係第一個剪呢個髮型兼走入北京人民大會堂嘅人大代表。不過，陳勇嘅太太就話呢個髮型冇咁老土，莫非暗示丈夫過去髮型一直好老土？唔知咁係讚定彈呢？
