政情：高鐵變地下城 黎廣就得

眾所周知，黎廣德向來大打保育議題，我哋翻查黎廣德過去嘅言論，發現佢對政府用地改建成商場及寫字樓有好大意見，例如當年政府想將中環舊政府總部西座翻新成甲級寫字樓，佢話政府西座有百幾年歷史，無必要為咗增加幾十億元賣地收入而改變土地用途，更加唔應該令交通負荷極重嘅中環雪上加霜，又話改建寫字樓會「益咗」地產商喎。

狂插老銅地下街

講得再遠少少，政府喺○六年曾經建議擴建港鐵銅鑼灣站及地下行人通道，興建地下商業街，有少少類似黎廣德近期提出嘅高鐵地下商城構思，但當年佢話銅鑼灣地底非常複雜，又有海底隧道、污水渠同煤氣等等多種管道，唔止技術上困難，興建過程中亦會對附近居民好大滋擾，所以唔支持。

及後到現屆政府建議在大嶼山對開填海興建人工島，諗住島上可以設立大型購物商場、酒店等設施時，黎廣德亦係第一時間反對，話搞人工島唔符合經濟效益，因為政府預計人工島每日只有六萬人次使用，根本撐唔起「橋頭經濟」。　

力拒邊境購物城

到最近有商界人士建議喺落馬洲興建邊境購物城，期望藉此解決水貨客問題，但黎廣德又係反對，先話購物城可能會刺激更多水貨客集中到落馬洲一帶，對新界北地區構成龐大人口壓力，又話項目一旦成功，只對持有地皮嘅發展商有利，屆時整個地區人流激增，發展商就可以向城規會申請發展住宅喎。

講到尾，大家會發現只要項目係涉及商業元素，黎廣德都幾乎會反對，但今次高鐵超支佢反其道而行，大力建議搞地下商城，簡直係自相矛盾，究竟佢記唔記得自己以前講過啲咩呢？今次佢真係老貓燒鬚！