中環出更：名人基層齊整餅撻著愛心
香港工業總會慶祝五十五周年嘅活動浪接浪，尋日趁周末喺九龍灣一個商場舉行「愛心曲奇日」，招呼約卅名基層兒童及家長齊齊整蛋撻及曲奇餅。工總主席劉展灝（Stanley）、蛋撻王董事總經理莊裕坤及「家電大佬」中華廠商聯合會常董陳國民等人着上圍裙整埋一份，不消幾分鐘就有香噴噴嘅蛋撻食。
工總行政總裁蘇家碧（Linda）都有到場，仲帶埋囡囡Kylie一齊嚟玩。Linda話，當年辭官就係為咗湊囡囡，話咁快Kylie已經讀小六，仲高過佢添。Linda九月將過檔港鐵出任公司事務總監，份新工係負責為錯漏百出嘅港鐵拆彈，點知近月高鐵超支兼延誤通車等甩漏愈來愈多，無異掘個大洞畀佢跳？Linda苦笑話，依家唔諗咁多！
望小童體驗飲食工業艱辛
咁啱得咁蹺，廠商會副會長陳淑玲（Shirley）及女兒路過，巧遇一班工業界好友喺度搞活動，眾人都喜出望外。Stanley即招呼Shirley食件蛋撻。Shirley笑笑口話，最近佢屋企裝修，需要添購廚具及傢俬，所以特登趁周末同囡囡嚟行吓，點知撞到老友，仲有蛋撻做下午茶添！
莊裕坤就話，依家小朋友已經好難接觸到農業及工業，以為想食米就去超市買，唔知米係農夫辛苦種出來嘅。今次活動可令小朋友親眼見證用麵粉及雞蛋炮製蛋撻，亦可趁機教識佢哋明白飲食工業嘅艱辛。
卓妮