有人話，政治如舞台，政客如戲子。睇吓香港嗰班不務正業嘅政客，就知道呢句說話講得一啲都冇錯。
呢，梁振英尋日出席今個立法年度最後一次答問大會，議事堂上例牌又係嘈喧巴閉，七國咁亂，甚至出現議員互罵場面，醜態百出，結果又有人被逐離場。面對此情此景，連立法會主席都忍唔住質問：「大家喺電視機前面仲表演唔夠咩？」
冇錯嘞，佢哋真係表演唔夠o架。香港政客冇嘢叻，最叻就係做騷，家陣難得有機會，仲唔盡情表演咩。港府斥責反對派拉布阻礙經濟民生，最終受害嘅係市民，呢點係人都知，但寄望政客唔好拉布唔好做騷，等於與虎謀皮嘅咋。
最離譜嘅係，好多民生議題因為反對派拉布而積壓，港府要求財委會下周加開會議，務求喺歇暑前清理包括創科局撥款等議題，本來係天經地義，正如一般打工仔未完成手頭工作就要加班一樣，點知反對派居然反咬一口，指當局以好勇鬥狠方式加會嘅做法係挑釁喎。嗱，呢啲咪就係賊喊捉賊囉，政客喺立法會掟嘢、掃枱、爆粗，唔通唔係好勇鬥狠？究竟係邊個挑釁邊個呢？
老實講，如果唔係反對派阻頭阻勢，又點會積壓咁多民生議題吖。政客享受高薪厚祿，但就冇做好份工，本來已經失職，家陣連加開會議都唔肯，一味掛住抖暑歎世界，你話佢哋對唔對得住納稅人吖？正如有人話齋，立法會近年經常拉布及流會，議員根本冇盡到自己職責，尤其係部分激進政客成日做騷博被逐，乘機提早收工，更加係白支薪金。
當然喇，白支薪金仲係其次，有破壞冇建設至係大件事。今年係抗戰勝利七十周年，大陸及台灣分別隆重舉行紀念活動，港府亦跟隨內地將今年九月三日列為特別假期，本來冇乜爭議性，點知反對派又係阿芝阿佐，有人話係「政治假期」，有人話係「獻媚」，有人甚至反對以「抗戰勝利紀念日」為名放假。喂，紀念抗戰勝利係所有中國人嘅事，政客究竟反對乜嘢呢？唔通佢哋係日本嘅代言人？
事實證明，反對派為反對而反對，為拉布而拉布，已經到咗走火入魔嘅地步。厚黑教主李宗吾曾經話過，「心子要黑，臉皮要厚」係搞政治嘅基本條件，而最高水平係「心極黑，臉極厚」。照咁睇嚟，香港政客就算未達到最高水平，最低限度都符合心黑臉厚嘅基本條件，唔怪得搞到立法會烏煙瘴氣喇。講起真係無奈，政客阻住地球轉，結果就要全港市民埋單，豈有此理！