政情：撐跳級制 「堯」言夭盡梁卓偉
中文大學醫學院早前宣布推出尖子可直升二年級嘅「跳級制」吸納「尖中尖」，惹來香港大學醫學院院長梁卓偉（Gabriel）極大反應，質疑教育係「冇捷徑」。中大校長沈祖堯尋日出席無止橋慈善基金一個新書發布會時，被問到應屆文憑試畢業生選科要注意嘅事項，佢就寄語學生最緊要揀啱自己鍾意嘅科，仲舉例話唔係鍾意做醫生就唔好揀讀醫學，費事第日先發現鍾意嘅原來係音樂，人生就會有缺陷喎。音樂？點解咁熟口熟面嘅？
寄語學生揀科莫盲從
眾所周知，Gabriel當年被父親迫讀醫科，本來想做音樂家嘅佢因為被父親反對，覺得從事音樂搵唔到食，被要求讀醫科，結果今時今日佢都依然常為樂團擔任指揮，可見其對音樂有幾熱愛。沈祖堯勸學生揀科時一定要揀自己鍾意嘅科，唔好受旁人或社會價值取向影響，否則夾硬讀完真係做到醫生，都唔會開心，總會覺得人生具備缺陷，輕輕幾句，真係夭到Gabriel應一應。
沈又話，「跳級制」絕唔係諗住醫學教育可有捷徑，快啲畢業去搵錢，而係希望香港可以培育多幾位除讀書外對醫學研究及發展都有興趣嘅人才，佢又保證中大唔會畀學生草率畢業成為醫生。