政情：醜！答問會街市化
立法會議員喺議事廳內吵吵鬧鬧已經唔係新鮮事，估唔到呢股風氣仲吹到去特首答問大會。尋日答問大會中，部分泛民主派議員隨便中斷特首梁振英發言，而且語帶挑釁；建制派議員就群起要求主席曾鈺成根據議事規則裁決泛民議員嘅行為，激到主席生蝦咁跳，仲罕有大動肝火，問一班議員喺電視前表演夠未，又呼籲議員維護議會尊嚴。堂堂議事廳，突然間變到街市咁，認真係國際笑話。
「電視前表演夠未」
答問大會喺上午九時三十分開始，人民力量陳偉業（大舊）及陳志全分別舉紙牌同黃傘抗議，社民連梁國雄（長毛）就遲大到，九點四十分才施施然走入會議廳，仲大叫「賊來了，哈哈」，當時曾鈺成已警告長毛違反議事規則，再犯就要離開會議廳。不過，泛民議員並冇停止嘅迹象，反而輪流發作，先係大舊不斷揮動紙牌同喧嘩，搞到特首要求主席裁決；工黨李卓人就質疑特首根據邊條議事規則要求裁決，而獨立議員黃毓民亦在叫囂。
泛民嘅紛爭未平息，轉個頭又到建制派扭計，工聯會黃國健及王國興、馬逢國、民建聯葉國謙先後要求主席嚴格執行議事規則，搞到主席扯晒火，話自己按議事規則主持會議，唔使人提佢規程問題，「大家喺電視機前仲表演唔夠咩？」，又呼籲議員要維護議會尊嚴。
鬧交擺家人上枱
其後長毛不斷喺座位上喧嘩，最終喺接近十時被趕離場，期間同保安拉扯及大呼小叫，主席宣布休會。以為休會可以令大家冷靜啲，點知議員愈吵愈烈，仲搬埋屋企人出嚟講。黃毓民同大舊係咁鬧特首，民建聯蔣麗芸（Ann）就出聲護航，話清理垃圾時要掃埋佢哋走。
大舊反駁話，當年前特首董建華就係掃完街就落台，依家民建聯請特首搞掃街，係咪想歷史重演；其後又指阿Ann嘅父親蔣震為共產黨服務，令阿Ann大怒，一邊步向大舊，一邊強調父親係抗日戰士，「你（大舊）估我唔知你老婆同個女做咩呀！」然後氣沖沖離開會議廳。阿Ann嘅黨友黃定光亦批評大舊唔應該搬人阿爸出嚟講，大舊反駁，話自己係高度讚揚蔣震喎。睇到議會咁嘅質素，香港想有運行都幾難。