中環出更：拋錯書包 AV仁失言不慚
立法會一連兩日開會審議抗日戰爭勝利七十周年紀念日假期草案，雖然議員普遍都贊成多一日假期，但泛民主派就覺得呢日始終係「政治假期」，所以審議時間拖足兩日。尋日臨近三讀表決，卓妮見到民主黨議員何俊仁（AV仁）由走廊一支箭跑入會議廳，以為佢要趕入去投票啦，點知原來係要為前日發生嘅甩轆事件補鑊，怕遲咗就再無機會喎。
誤將吳學謙當唐家璇
AV仁一入到會議廳就好心急舉手要求發言，話要澄清一件錯誤。原來佢前日二讀發言時拋錯書包、引錯歷史，錯將一九九八年陪同時任國家主席江澤民訪問日本嘅外長唐家璇，講成係吳學謙。不過，AV仁睇嚟無為自己講錯歷史而慚愧，反而仲大鬧唐家璇自稱日本專家，但錯誤了解當時情況。
見AV仁鬧得興起，代主席梁君彥好快就中斷咗AV仁發言，話呢個時間唔係畀佢用來「更正二讀時嘅錯誤」。其實議員成日想豐富發言內容，引經據典都係人之常情，但依家網上世界發達，好多嘢都係查一查就知道，小小錯誤都會被網民無限恥笑，睇嚟議員唔識嘢就唔好亂拋書包喇。
卓妮