中環出更：曾浩輝忙追女「集郵」
美國上月底通過同性婚姻合法化，成為世界熱話，連性取向一直惹來外界揣測嘅衞生防護中心前總監曾浩輝都關注呢個議題。獨身多年嘅曾醫生，外間盛傳佢擇偶嚴謹，絕色佳麗都難以打動佢。不過，前日佢出席活動時，連聲否認對女性無興趣，笑言退休後最忙係追女仔，隨即拿出手機內一張與美女嘅合照「示威」，難怪講到同性婚姻合法化，佢都淡淡回應話「無特別感覺」喎！
退休已兩年多嘅曾浩輝，前日出席友人陳宇齡（Abraham）任主席嘅培力控股上市慶祝酒會，但身邊未見有女伴相隨。不過，佢似乎唔心急，仲向卓妮展示手機內的「集郵相」。係咪新女友？曾醫生賣關子話：「唔話你知」。提到同性婚姻，佢輕描淡寫話無乜意見，但當年去美國深造時曾接觸呢個議題，感覺「幾政治化」，所以覺得香港未夠成熟令市民支持喎。
陳宇齡公司上市日遇股災
當晚宴會席間唔少名人狂刨財經新聞，關注近日中港股市跳樓式下跌，就連曾浩輝買藍籌股都要做「蟹」。同場嘅香港南京總會創會會長張心瑜話，佢都忍痛斬倉保住微利，但有朋友慘輸逾億元；更有朋友喺股災前個幾星期以初哥身份入市，一買就輸幾百萬元，好陰功。
協成行董事總經理方文雄都直言身家縮水，但手上股票係爸爸多年前買落，即使股市狂瀉，仍有錢賺，會趁低撈優質地產股及科技股。數最慘嗰個，應該係Abraham，佢公司喺港股大跌兩千幾點當日上市，股價慘被質到「潛水」，好彩尋日升返上五元。
卓妮