孭老翁落33層樓 救人警長獲讚
【本報訊】勇警長孭老翁行卅三層，成為救人英雄獲讚好。行動不便的老翁昨火警期間被困家中，洋名Gary的新界北總區衝鋒隊姓楊沙展，二話不說孭起老翁，徒步行足卅三層樓梯落地下，將他帶至安全位置，街坊大讚他有氣有力又有愛心，老翁家人亦感激不盡，Gary則謙稱：「呢樣係我最開心嘅，因為幫到人……每個人都有父母，會感同身受，如果係自己父母，行三千三百卅三層樓都冇問題啦！」
謙稱「職責所在」
加入警隊十六年的Gary憶述：「我去到個火警現場時，消防仲嚟緊，即刻上樓拍門叫人疏散，拍到卅三樓見到個伯伯想走，震晒隻腳企喺度，好無助，同埋見到佢用成人紙尿褲。」老翁一見他便問：「我點走呀？點算呀？」Gary立即安撫他，然後孭起他落樓，並說：「佢太驚啦，當時攬到好實，標晒冷汗，落到樓我背脊都有少少濕。」他坦言：「真係非常之攰。」但他認為是「職責所在」，並感謝市民對他的支持，希望可以「畀多啲正面形象畀大家。」