未入正題之前，功夫茶先同大家講吓歷史。古羅馬帝國當年南征北討，威武異常，點解最後都係煙消雲散呢？專家認為其中一個原因係當時羅馬人日常生活中廣泛使用鉛呢種物質，甚至上下水道同浴場中嘅水管都係用佢，民眾吸埋吸埋，流產同死胎個案大增，唔使等敵人入侵，自己已經死咁大半啦！
好嘞，大家知道鉛中毒後果有幾咁嚴重，再睇吓以下呢個調查結果，肯定嚇到有得震冇得瞓。早排有政黨委託化驗所抽查九龍西十三個屋邨及大廈嘅水質樣本含鉛量，結果發現入伙只有兩年幾嘅啟德啟晴邨，個別樣本比世衞超標高達二點八倍，估計同喉管接駁零件及焊接物含鉛有關。雖然政黨上月底再檢驗相關大廈食水，發現數據有所下降，但部分仍屬超標。有街坊反映，近排食水呈淡黃色，仲傳出陣陣化學品氣味，一定有問題喇。
嗱，如果大家對鉛超標問題仲有疑問，不如聽吓專家點講喇。原來鉛係一種重金屬物質，人體吸入後唔可以自然排出，積聚到一定水平可能導致慢性中毒，特別係初生嬰兒，更有機會出現智力同行為問題，絕對唔係講玩o架。咁房署又點回應呢？佢哋就大派定心丸，話早就知悉啟晴邨食水水質問題，但抽驗結果符合世衞標準，即係叫市民唔使驚咁話。
房署嘅回應一啲唔出奇，次次都係人哋查出有問題，官老爺就話冇問題，到底邊個講大話，大家心裏有數喇。話時話，兩年幾新樓都可能出問題，其他樓齡更耐嘅公共屋邨仲得了嘅。計功夫茶話齋，為安全起見，唔單止啟晴邨街坊，全港公屋居民都應該要求水務署重新化驗，一於打爆水務署電話喇。
講真，公屋食水污染早就唔係新聞咯。就上個月之嘛，水務署喺慈雲山進行更換水管工程，部分屋邨暫停食水供應，點知恢復供水後發現食水含有黑色沉澱物，又濁又臭，搞到部分街坊要上山擔水。又好似深水埗富昌邨咁，懷疑因為水管日久失修，自來水出現鐵銹沉澱物，房署居然睬你都傻，又係死撐冇問題，直頭係死豬不怕開水燙呀。
咪以為淨係大廈水管有問題，地下水管一樣殘嘅殘，爆嘅爆，每年因滲漏浪費嘅佔整體食水達一成六，高過周邊國家同地區多多聲，浪費公帑億億聲不特止，每次爆水管更加險象環生，試過有車輛爭啲因地陷而沒頂，問你點頂。
地下水管盤根錯節，有人形容係城市嘅血管，真係幾貼切。家陣「城市血管」問題多多，一爆再爆，千祈唔好搞到古羅馬悲劇重演吖！