民主黨（白鴿黨）黃碧雲（一舊雲）前日舉行記者會，公布驗出啟晴邨有食水樣本鉛含量超出世衞標準，但房屋署堅持話驗完無超標，搞到雙方好似自說自話。據聞有官場中人私底下批評，一舊雲唔肯交代喺邊度抽水辦，質疑佢嘅抽驗方法準確性。
一舊雲起初承認基於私隱問題，冇交代超標樣本係來自邊一戶畀相關部門，但前日傍晚已經交晒啲超標樣本嘅資料，包括來自邊一戶嘅地址、家庭資料同聯絡方式，再加上化驗所報告畀衞生防護中心。一舊雲仲反咬一口話，好想睇番房署個報告嘅結果同數據。
身為九龍西議員嘅一舊雲一抽抽起千重浪，引發另一名同區議員蔣麗芸喺社交網站話，事件已經引起部分居民恐慌，事關如室內水管有事，咁比啟晴邨遲半年入伙嘅德朗邨點解冇事，為此佢已去信水務署同房署，要求徹查清楚事件。
泛民方面，民協位於啟晴邨同德朗邨嘅社區主任李庭豐亦加入戰團，聲稱發現有住戶嘅水龍頭內裏有大量疑似沙石及黑色粒狀物體，令居民關注食水同水龍頭質素問題。話時話，今次真係一係唔抽水，一抽水就有條路，而且全城關注嘞！