政情：高佬賢氹老婆「澳洲」度蜜月
漁農界議員何俊賢（高佬賢）去年底同太太結婚，唔經唔覺過咗大半年。高佬賢尋日出席活動時話，今個暑假要去台灣、廣東、北京等地公幹，因此不斷被太太埋怨，咁耐都冇得去度蜜月。就此，高佬賢自爆同太太講，「度蜜月？我同你去動物園就得」，其後講講吓又話遲啲先，希望今年去到，之後再提出新建議話不如去「澳洲」，即係大澳同長洲喎。
大澳及長洲
高佬賢對同太太度蜜月嘅計劃一時一樣，唔知幾時講真定講笑。有人話擔心佢哋去大澳同長洲度蜜月，太太會勁唔開心。不過，高佬賢一副大安旨意模樣，自言開唔開心，唔係同你去唔去旅行，係同佢傾得開唔開心，總有一日會還番個蜜月畀太太。
當問及佢呢啲手法真係「呃到」老婆，高佬賢話已經呃咗個太太，就係畀太太一個美好嘅憧憬：「你睇我哋嘅前途幾咁光明，依家我哋一路向前行，就會見到度蜜月個位」。莫非高佬賢對太太呃呃氹氹，就係佢哋嘅相處之道？