政情：尖中尖掀中港大戰
「中」「港」矛盾進一步升溫！不過今次唔係涉及個人遊、水貨客或雙非嬰等內地與香港特區之間嘅矛盾，而係講緊中大醫學院院長陳家亮同港大醫學院院長梁卓偉，就中大醫學院推出「跳級制」引發嘅爭議。梁卓偉日前公開質疑中大容許部分「尖子」直升二年級讀醫，係「走捷徑」同「相煎何太急」嘅做法。陳家亮忍咗三日之後，尋日透過社交網站反駁，強調中大提出嘅「跳級制」完全符合國際標準，唔存在「走捷徑」同「濃縮版」嘅問題，反指有人誤會咗佢哋嘅建議，「令我感到嘆息」。唔知佢係咪覺得梁卓偉誤會咗佢呢？
陳家亮：符國際標準
兩大醫學院嘅明爭暗鬥已有數十年歷史，自兩位年輕院長陳家亮同梁卓偉上場後，雙方嘅鬥爭更日趨白熱化。早前中大醫學院宣布推出「跳級制」，容許部分「尖子之中嘅尖子」直接入讀醫學學士二年級，變相將六年制嘅醫科課程縮短咗做五年。可以早一年畢業做醫生搵真銀，自然吸引力大爭，難免會惹來競爭對手港大醫學院不滿。就此，梁卓偉日前會見傳媒時爆料，話喺發畀一位私人朋友嘅電郵中，以「本是同根生，相煎何太急」嚟形容今次爭議，暗批中大醫學院藉「跳級制」向港大搶客。
陳家亮尋日喺社交網站終於出招，發表題為「學醫無捷徑」嘅文章，強調不論係本港定係海外嘅大學，素來都有容許成績特別優異嘅學生，豁免第一年基礎課程嘅某啲科目。最重要嘅係，即使醫科課程由六年減至五年，學生必須修讀嘅核心課程並冇少到，完全符合本地訓練醫學生嘅要求，根本唔存在「走捷徑」同「濃縮版」嘅問題。
醫委會明加議程討論
陳家亮嘅反駁好似好有道理，但「跳級制」最終搞唔搞得成，仲要過負責審核醫生執業資格嘅醫務委員會嗰關。醫委會主席劉允怡尋日首次開腔回應事件，形容有關問題關乎本港未來畢業醫生嘅水平，非常重要，醫委會有責任把關。醫委會已決定喺明日嘅會議加插議程討論事件，並會邀請兩大醫學院派代表出席解釋，言談間似乎佢亦畀陳家亮嘅「創意」嚇親。
醫委會委員周伯展更強調，讀書需「循序漸進」而非「鬥快」，學生讀多一年大學一定會成熟啲，似乎對「跳級制」有所保留喎。