中環出更：藝術啟航進駐赤鱲角
近年多個大型藝術展覽進駐香港舉行，連帶好多公共交通設施、公共空間都擺設愈來愈多藝術作品，其中啟用咗十七年嘅香港赤鱲角國際機場，尋日舉行「香港藝術、文化與音樂巡禮」揭幕禮，多幅大型藝術及音樂作品展出及播放。卓妮見到倫敦奧運美術大展金牌得主林文傑（Dominic）亦在場，佢仲蒙眼即席揮毫顯身手，吸引唔少旅客觀賞。
讓旅客眼睛遊世界
Dominic除咗發明「折光畫」外，仲係德州生物科技之父，成立過世界眼科組織進行防盲治盲等工作，今次佢選擇擺放於機場一號客運大樓作品中，就有其獲獎作品《從長城到泰晤士河—擁抱世界》，描繪多個世界著名建築，讓旅客未出發，眼睛已先遊覽世界。
除咗畫作，攝影作品及音樂亦係藝術不可或缺嘅元素。尋日同場仲聚集咗一班音樂人，包括傑出鋼琴家兼指揮家蔡崇力及音樂人黎小田等。講起外國有機場放置咗一台鋼琴後，吸引旅客即興演奏並被拍下演出過程，蔡崇力話都有同機場提議過，但鋼琴係大型樂器，因此要顧慮埋消防問題，不過佢相信有解決嘅方法可以再斟酌。
至於上任個幾月嘅機場管理局主席蘇澤光，同行政總裁林天福亦齊齊現身支持活動，其中林天福聯同運輸及房屋局局長張炳良、機管局藝術及文化諮詢委員會主席馮婉眉參觀幾個展覽區。
現場所見，張炳良對其中一個用罐頭砌成嘅天壇大佛非常感興趣。佢話細個好少砌積木，但覺得啲罐頭好有香港特色，而佢細個年代食罐頭係好奢侈嘅事，亦好鍾意食豆豉鯪魚。
卓妮