高翔苑大堂翳焗如蒸籠
油塘高翔苑早年落成時，其中五座因應停售居屋政策而改為出租屋邨，為與其他公共屋邨「一視同仁」，已安裝在大堂的冷氣機即時被拆，惟房署卻未有完善通風設計，令大堂驟變「蒸籠」，酷熱天氣下居民無不叫苦連天。區議員要求房署加裝通風設施，改善大堂翳焗環境。
「呢度以前係居屋，大堂原本有冷氣，但就話因為其他公屋冇冷氣，房署要一視同仁於是就拆晒（冷氣機），之後淨係喺側邊加番啲窗仔，但啲窗好細隻，鬼咁焗！」郭先生居於高翔苑高麟閣，不滿房署拆除冷氣後，未能完善大堂通風設計，居民每次候升降機皆如身處「蒸籠」，擔心隨時中暑。
室內34.6℃ 難為保安員
郭先生要求房署繼續改善通風設施，以解居民之窘。「雖然大堂有風扇，但都冇用，真係辛苦晒啲保安要長時間坐喺度。其實每幢樓出面都好好風，但啲窗咁細隻，開盡都吹唔到入嚟！」
記者曾實地了解，於正午時分在大堂錄得攝氏三十四點六度高溫，較室外攝氏三十二度氣溫還要高，大堂雖已設置九把風扇，惟室外鮮風未能透過氣窗及鐵閘透入大堂，悶熱非常。
高翔苑物業服務辦事處發言人表示，高翔苑其中五座為公屋，於二○○四年開始入伙，過往曾接獲居民反映，要求加強大堂通風。現時平台大堂入口已設有通風的疏子鐵閘，因應居民意見，房署已於○九年在其中三座公屋大堂的兩側各安裝一列通風窗，增加空氣流通；並於其餘兩座（高瑞閣和高恒閣）的一側增設一列通風窗。
就本報查詢有關通風設計是否失當一事，發言人未有正面回應，僅稱近年接獲該兩座居民反映希望在另一側加設通風窗，當局亦已落實進行。
區議員促增設冷風機
「我哋住呢幢夠兩邊都整晒窗啦，咪又係冇風！其實有冇諗吓其他方法改善？」郭先生直斥房署未有正視現有通風設計不足的問題，要求嚴正檢討。
當區區議員謝淑珍表示，今年踏入夏季即接獲不少街坊投訴大廈大堂異常翳焗，「高翔苑原本係居屋設計，大堂通風主要都係靠冷氣，依家冇咗冷氣，通風就會比其他屋邨弱。」謝坦言已多次向房署反映居民意見及要求改善，房署雖已採取多項改善措施，惟仍未能根治問題，要求房署密切留意大堂通風效果，並於適當時候加設冷風機，為居民提供一個合理而舒適的居住環境。
記者：呂諾君