假難民源源不絕，搞到香港烏煙瘴氣，七國咁亂，港府束手無策，唔係扮鴕鳥當睇唔到，就係小修小補，結果問題冇改善不特止，反而不斷惡化。
即係咁，鑑於來自南亞及非洲嘅假難民愈來愈多，港府舊年三月起簡化審核機制，將「酷刑聲請」、「不人道處遇」同「難民迫害」三合一處理，原本諗住加快審批程序，縮短聲請人滯港時間，可惜事與願違。保安局數字顯示，入境處今年頭五個月共接獲一千八百幾宗免遣返聲請，去年三月至十二月就接獲四千六百幾宗，加加埋埋，累積個案已接近一萬宗，問你怕未。
小數怕長計，港府為聲請人提供嘅各項支援，包括法律、住屋及食物等開支不斷飆升，三年前係三億九千萬元，今個財政年度預算達六億四千萬元，港府假仁假義，納稅人被迫埋單，簡直冤哉枉也。
講開又講，港府難民政策漏洞百出，係又幫唔係又幫，淪為假難民嘅提款機，早就唔係新聞咯。本報早前踢爆，有印度裔人士「組團」來港，一落機就提出酷刑聲請免遣返，仲要由同一位南亞裔律師代表添。原來有人未卜先知，預早向入境處報案，等假難民一到立即提出聲請，如果話當中冇蠱惑，三歲細路仔都唔信啦。
港府中門大開，對假難民完全不設防，浪費公帑仲係其次，引發各種社會及治安問題先至大鑊。係人都知，九成九免遣返聲請個案同酷刑無關，呢啲南亞及非洲裔人士根本係經濟難民，佢哋一方面領取港府津貼，一方面打黑工賺錢，有啲甚至作奸犯科，黃賭毒黑瓣瓣齊。有立法會議員形容呢啲假難民「又食又拎」，擺明搵香港人笨，真係一語中的。
假難民不斷湧入，唔通港府真係闊佬懶理？入境處聲稱已經簡化聲請表格，包括減少提問，以及盡快進行審核會面，目標係將審批時間由平均廿五個星期縮短至十五個星期喎。其實講乜都係假，港府一日中門大開，假難民只會繼續湧入，無論點樣加快審批，都係嘥氣嘅啫。正如有人建議，港府就算唔重新審視國際難民公約，檢討難民政策，最低限度亦要修訂入境條例，取消假難民相關國家嘅免簽證待遇。再唔係可以學英國咁立法限制，偷渡客一旦證實係假難民，即時停發生活津貼，亦唔准留喺英國上訴。人哋識得靈活變通，與時並進，點解港產官僚梗係墨守成規，一成不變呢？
有人就講得啱嘞，對假難民仁慈，即係對港人殘忍。今時今日香港七國咁亂，港府自身難保，仲要開門揖盜，自討苦吃，你話係咪愚不可及吖！