政情：梁卓偉嘆中大「相煎何太急」

原來，Gabriel私底下仲回覆咗個電郵畀一位「私人朋友」，一方面強調醫科係「人命攸關」，唔可以亂咁跳級，Gabriel仲引用埋古詩「本是同根生，相煎何太急」，叫中大醫學院搞清楚競爭對手。

「人命攸關」拒推跳級制

Gabriel尋日同傳媒茶敍，一坐低又再被問到會否跟隨中大醫學院玩跳級制，佢即刻強調學生讀港大定中大，真係屬個人選擇，從來都唔想特登搶學生、爭學生，學生適合讀個課程先最重要。

不過，佢坦言任何跳級安排對學生來講都會好吸引，只係必須釐清咁樣跳法啱唔啱規矩囉！講到跳級可唔可行，佢就堅持暫不打算實施呢種安排：「正如我之前講，人命攸關嘅醫科，真係要諗真先！」

為咗說服大家兩間醫學院「真係」冇不和，佢仲讀出自己之前寫嘅電郵，大概內容話「本是同根生，相煎何太急」，兩間醫學院真正嘅競爭對手係內地、外國嘅醫學院，而唔係中大同港大自己人鬥自己人，大家應該一齊令香港醫學教育進步。至於封信寫畀邊個，但Gabriel就話要保持秘密喎！