民主黨（白鴿黨）「超級區議員」何俊仁（AV仁）今年一月宣布會喺政改方案否決之後發動辭職變相公投，轉眼六個月過去，政改方案亦遭否決，佢尋日終於宣布將取消以辭職發動變相公投嘅計劃。
其實之前AV仁一直以「等政改否決」為理由拖延決定係咪辭職，去到六月中政改方案被否決之後，又話要同黨內外再開會商討，一直議而不決，分明係想縮沙唔玩。佢尋日解釋係因為社會氣氛冷淡，覺得無足夠嘅支持同信心進行公投，加上年底會有區議會選舉、明年又有立法會選舉同新界東補選，覺得用精力應付選舉會比較實際。除咗新界東補選外，兩場選舉都一早定晒，AV仁擺明就係輸打贏要，搵藉口縮沙。
被問到之前決定係唔係太倉卒，AV仁承認支持度同估算有落差，但就話唔係因為白鴿黨一味拖而搞唔成囉。不過，一直主張要搞辭職變相公投嘅社民連議員梁國雄（長毛）就唔係咁睇，佢尋日暗批AV仁無心做，所以做唔到，又話公投唔成功係因為錯失時機。
其實，AV仁之前開記者會就係威係勢，依家縮沙唔玩，一定被各方嘲笑，今次教訓大家，做咩之前要三思而後行，唔係好似AV仁咁，真係攞嚟衰啦！