政情：建制調兵狙擊 范票勢危
區議會選舉將喺十一月舉行，泛民主派一班「雙料」議員將會係建制派狙擊目標，當中以地區工作起家嘅新民主同盟（新同盟）立法會議員范國威（Gary）就係佢哋嘅頭號目標。泛民、建制理論上已經定好各區參選人，但有地區消息透露，沙田及西貢區有所異動，本來建制派協調由工聯會高永聯硬撼Gary，但近半個月起，就改由經民聯年輕律師申偉基接手，聽講佢仲會扮獨立人士參選，睇嚟Gary要醒醒定定喇！
新同盟一○年成立，一一年區議會選舉首次喺西貢、沙田及大埔派出十人參選，八人當選，成功率好高。佢哋今年會派更多人出選，建制派擔心佢會繼續坐大，打算出手狙擊。據講申偉基本來打算喺沙田火炭選區出選，硬撼現任公民力量龐愛蘭，同場仲有盛傳出選立法會新界東補選嘅公民黨楊岳橋。不過，據知操盤人亦認為，兩個建制派咁打法，隨時益咗泛民，就決定將申偉基調去「打大佬」喇。
傳申偉基退出經民聯
Gary位處嘅西貢運亨選區，本來建制派協調由高永聯出選，但操盤人考量過勝算後，就決定轉人；而申偉基唔用經民聯排頭，就惹嚟唔少揣測。有人話經民聯早前喺政改方案投票「甩轆」，擔心變成負資產；更有指經民聯之前唔支持申打番建制派，申就憤而退黨。我哋問過申偉基，佢就無厘頭叫我哋睇佢社交網站專頁，又話有嘢做緊，「遲啲講」，避答轉區、除黨名以至退黨之說。
馮檢基亦為「目標」
咁高永聯又會去邊？有地區消息就透露，佢會轉去打另一名新同盟議員、西貢澳唐選區議員張國強，但呢個選區早已被西貢區議員方國珊發起嘅專業動力成員歐陽浩崑插旗，至於點解兩名建制派打一個泛民？我哋會留待下回分解。此外，我哋早前已講過，身兼深水埗區議員嘅民協立法會議員馮檢基亦係被建制派狙擊目標之一，工聯會小花「蝨王欣」陳穎欣誓要擊倒阿基，再創成功「打大佬」神話，睇嚟一眾雙料議員將會好唔得閒。