中環出更：懲教署長話當年 留鬚裝威嚴
近年流行單車環島遊，除咗返璞歸真用原始方式去旅行外，亦有人藉此身體力行籌款。由懲教署成立嘅懲教社教育基金，呢幾日就舉辦青海單車行，全程約三百五十公里，目標係籌到五十萬港元，用以推動青海省教育發展。喺早前嘅啟動禮上，卓妮見到懲教署署長邱子昭，佢對踩單車唔算好熱衷，反而每日都要游半個鐘水先精神奕奕返工。
邱子昭話，游早水呢個習慣已經維持好多年，自由式、蛙式同背泳樣樣游齊，希望藉此鍛煉身體唔同肌肉。另外，大家都可能留意到佢有留鬍鬚，但背後嘅故事就唔係個個知。話說佢二十歲就加入咗懲教署，年紀輕輕望落去好嫩口，亦無乜威嚴。為咗令自己望起嚟成熟啲，佢決定留兩撇鬍鬚，後來發現留鬚對工作都有幫助，一舉多得。
同場仲有前國家排球隊女將孫玥，其丈夫係高級懲教主任何國文，所以帶埋兩個囡囡支持今次活動。講起孫玥點樣結識到做懲教嘅丈夫呢？何國文話，佢本身係永倫籃球隊，經朋友介紹下認識孫玥，雖然孫玥有好多粉絲，但佢最終抱得美人歸，喺○七年拉埋天窗，並育有兩位千金。
教囡囡排球？ 孫玥話未得
雖然已為人母，但本身係排球名將嘅孫玥，相信不時都會技癢，現時佢就喺傳統名校拔萃女書院擔任排球教練。至於幾時先傳授排球絕技畀囡囡，孫玥就話要等囡囡大個啲先至得。另外，保安局局長黎棟國亦係主禮嘉賓之一，被問到識唔識踩單車，佢笑稱自己唔算專業，但都識踩，仲吸引咗兩名單車代表一齊合照添。
卓妮