正當立法會財務委員會上星期剛剛批出將軍澳海水化淡廠第一階段設計及建造工程撥款，人民力量議員陳偉業（大舊）就去信發展事務委員會主席謝偉銓（Tony），建議委員會搞番個以色列考察團，視察當地嘅海水化淡技術，同了解當地政府推動海水化淡嘅政策喎。不過，議員外訪慣常順便遊覽，經常被批評用公帑遊埠，唔知今次班議員又會否提議「順便」暢遊耶路撒冷、約旦河或加利利湖呢？
大舊日前去信Tony，指以色列氣候乾旱，但依然透過海水化淡技術提供當地八成家居食水，而且成本低廉，每立方米只係四港元多啲，較香港向內地購買東江水每立方米成本要成九元更加抵，希望借考察團協助港府制訂有效海水化淡政策。
理由固然好聽，但記得工商事務委員會去年都計劃外訪以色列，向當地嘅創新及科技發展經驗取經，惟保安局其後因應當地局勢緊張，向以色列發出黃色旅遊警示，唔少議員都因為咁臨陣縮沙，而黃色警示至今都未取消，大舊點解仲要冒險呢？我哋問過大舊，佢話已經去過以色列，唔使借外訪旅遊，又話黃色警示只係「好輕微」，相信唔會有事，希望最快聖誕、新年出發，趕唔切就等到下年復活節喇。