政情：八網難逃：寫錯字 白鴿靚女自動罰抄
尋日網上瘋傳一張由民主黨（白鴿黨）沙田區議員鄭則文同靚女社區主任曾素麗（Yen）名義發出嘅宣傳單張，呼籲市民最遲要喺尋日截止前登記做選民，點知就將「截止」寫錯做「載止」，變成「７月２就載止啦！」，政黨單張有錯字都唔係首次，自然逃不過網民法眼，但有人肯主動認錯認真寥寥可數。
阿Yen其後於社交網站主動留言，表示「對不起，我錯了，罰抄一百次」，然後附上一張相片，顯示佢於紙上罰抄一百次「我以後唔會再寫錯個截字。」
阿Yen主動認錯又乖乖自動罰抄，楚楚可憐嘅舉措令網友留言急轉軚，安慰佢唔好唔開心。阿Yen留言話保證以後唔再寫錯字。阿Yen識得主動拆彈，又冧得掂一批網友，睇嚟真係錯有錯着！
