政情：鋒芒褪 學民籌款暴減

民陣僅籌25萬 不及學民一半

學民今年七一共籌得五十四萬元，對比民主黨等泛民政黨吸金力絕不遜色，但對比學民去年籌到一百三十一萬元，實際上真係按年暴跌六成，以金額計，較籌款數字暴跌逾六成嘅社民連更加傷。據知學民會址九月起會被業主加租，所以學民七一當日懶理食環署已經拒絕團體於怡和街部分路段設置街站，都要揀最旺場嘅路段總動員嗌咪搏命吸金，加上黃之鋒日前同女朋友當街遇襲受傷，當日善款由朝到晚陸續有來。

歷年民陣七一遊行旨在畀市民向社會發洩不滿，近年逐漸成為各大泛民團體重點籌款日子，唔少團體靠一日捐款數字維持該年度財政開支，所以唔少團體都好緊張民陣遊行人數，始終善長同善款成正比。近年仲多咗團體借民陣場地宣傳環保、國際關係等理念「順便」籌款，部分同民陣理念唔咬弦嘅本土派團體更事前無協調下擅自擺街站。咁最後會唔會按慣例分帳十分之一畀民陣？答案當然唔使問喇！民陣尋晚終於埋完數，今年籌得二十四萬八千元，較去年少十九萬元，故民陣今年籌款連學民一半都冇。

應反省社會所需 勿只向錢看

不過，港人多年來都係有聚焦爭議先會走上街爭取，政改表決後市民出現疲態好正常，黃之鋒與其歸咎修改《基本法》呢個訴求未能爭取社會共識而令遊行人數下跌，不如反省吓現時社會最需要咩好過，而唔應該淨係着眼於數字，否則令人覺得佢緊張籌款多過遊行原意，咁就唔好怪咁多團體落場擺檔爭飯食喇！