中環出更：曾鈺成自嘲「人蠢無藥醫」
早前建制派WhatsApp群組訊息外洩，揭露立法會主席曾鈺成涉嫌違反中立原則，喺政改方案表決期間向建制派披露泛民主派嘅行動詳情，雖曾鈺成已經向建制及泛民道歉，但事件仍餘波未了。佢尋日再次喺電台自嘲係「戇居」同「人蠢無藥醫」，仲承認當日同建制派WhatsApp係唔應該，雖然「錯就係錯」，但佢覺得自已主持會議時無偏幫，亦無唔公道，拒絕向市民道歉。
「戇居」累己累人
估唔到曾鈺成一件「戇居」事，唔止令自己可能連主席都無得做，仲連累埋其他議員。
今日內務委員會（內會）召開本立法年度最後一場會議，因為人民力量要喺內會向曾鈺成提不信任動議，加上民主黨胡志偉提出成立調查高鐵專責委員會，令到內會會議延長。緊接其後嘅財務委員會更加要順延到五時先可以開始，搞到晚上十一點四十分先可以完會，連開九小時會議，對於依家嘅尊貴議員嚟講，真係好辛苦。
雖然曾鈺成自嘲「人蠢無藥醫」，但就透露唔做主席之後，將會籌組智庫，仲話已經有商界資金同有心有力嘅青年人會參與。究竟「蠢人」搞智庫可以做到啲咩呢？大家真係要拭目以待喇！
卓妮