政情：八網難逃：卿姐關懷女性 倡設泳池周票

天時暑熱，唔少市民都會經常去游水消暑，如果去康文署轄下嘅泳池，買月票點都係抵啲嘅，但對女性來講就唔多抵喇。立法會議員劉慧卿就好細心，留意到泳池月票忽略咗男女之間嘅生理差異，事關唔少女性泳客每月總會有幾日、甚至一個星期，因為經期而不便去泳池游水，嗰幾日有月票都冇用，所以劃一月票收費三百元對女性唔公平。卿姐建議，除咗月票之外，應該設立每張七十五元嘅周票，以提高服務彈性，畀有唔同需要嘅市民選擇，亦都可以對女性公平啲喎。