立法會工務小組委員會尋日召開暑假休會前最後一次開會。唔知係咪因為區議會選舉臨近，之前「拉布」嘅泛民都收晒工，急急通過多項工程撥款，因喺呢個會過唔到嘅議程，就趕唔切暑假前，交到財務委員會審批。泛民經常話民生無小事，唔想選舉票債票償，「拉布」都要跪低。
一開波第一項議程，係審議十個社區重點項目計劃，用咗最耐時間，一共討論咗兩個幾鐘。不過，出奇地未有泛民議員要求點算開會法定人數，或故意不斷發言拖延時間，最後都順利通過十個社區重點項目計劃。
之後三項議程都用咗唔使一個鐘就討論完，明明加時半個鐘嘅會，眼見餘下大約十五分鐘，議員同官員都開始慌，官員臨尾有幾項直程唔講簡介，議員都唔敢提問，極速表決七項議程，最短時間嗰項只係用咗一分鐘多啲就通過咗！期間議員梁家傑同官員講嘢好似玩急口令咁，教育局副局長楊潤雄仲急到「疊聲」搶閘發言。
不過，到最後都仲有六項議程過唔到，包括活化虎豹別墅及必列啫士街街市、六個社區重點項目計劃、港珠澳大橋香港口岸嘅填海及口岸設施等撥款，其實市民一樣可以要泛民票債票償。