中環出更：港台書獎 惹鼓吹港獨疑「雲」
香港電台尋日舉行一年一度嘅「香港書獎」頒獎禮，選出年度書籍，經過去年佔領行動，唔少得獎書都同香港本土身份有關。我哋尋日喺頒獎禮上，竟然見到《香港城邦論》作者、同港獨及本土派行得愈來愈近嘅陳雲獲獎，唔通港台鼓勵宣揚港獨？原來港台只係頒獎畀佢有份寫嘅書《香港粵語頂硬上》啫！
我哋問陳雲點睇本土思潮，佢就話係源起於「普教中」、雙非兒童等事，令民間受壓，港人覺得生存空間被破壞。講到早前有涉嫌本地激進派製造爆炸品，佢就唔回應係咪認識嗰啲被告，叫我哋問番警方喎。咁佢身為嶺南大學嘅副教授，有冇受大學壓力呢？陳雲好玄咁話：「香港九七後冇咗大學」，唔知各位點理解佢嘅說話呢？
周保松「三代同堂」
講番其他得獎書，佔領行動期間，唔少人喺佔領區手執由中大政政系助理教授周保松寫嘅《政治的道德：從自由主義的觀點看》，周尋日就多謝同場恩師、教育學院亞洲及政策研究學系講座教授呂大樂，點知出版社編輯原來係周保松學生，變成「三代同堂」。
卓妮