中環出更：鄉局酒會 發叔拄杖現身
新界鄉議局前主席劉皇發（發叔）自從五月底忽然宣布放棄連任主席，加上早前表決政改方案發生「等埋發叔」甩轆鬧劇，發叔一直深居簡出，連立法會會議都統統缺席。久未露面，發叔尋日終於現身鄉議局嘅「七‧一」酒會，雖然佢全程右手撐住拐杖出入，但頭腦仲好精靈，對一概不利嘅傳聞不作直接回應。
傳無意提早轉讓議席
有報道話發叔一直部署連任鄉議局主席，只係被西環同鄉議局副主席張學明聯手逼宮而無奈放棄；亦有指佢會提早將立法會議席交棒畀大仔、現任鄉議局主席劉業強（Kenneth）。發叔聞言只係話「乜嘢都見唔到」，又話「唔講住，等身體好番先」，「順住健康發展」喎。
事實上，卓妮聽聞Kenneth接任鄉議局主席嘅時間太短，十月先正式舉行就職典禮，發叔無意急於任內交棒畀Kenneth接任立法會議員，點都做埋明年任期完結，明年底選舉先再執位。至於會唔會有人想同Kenneth爭位坐？有鄉紳笑言想搶，但都要搶到至得O架。
劉業強滿場飛避追訪
至於Kenneth，可能新上任冇耐，除咗擔大旗致詞外，似乎未係好習慣面對鎂光燈，被連番追問下都只係帶我哋「遊花園」，喺酒會滿場飛，行來行去避開追訪。
卓妮喺酒會上仲見到華懋慈善基金主席龔仁心，佢笑言經歷八年官司纏身嘅日子，加上退休冇再行醫，依家樂得清閒，得閒同太太行吓山，幫手管理慈善基金過日辰。
卓妮