衰開有條路，國泰航空公司最近好似撞咗邪咁，烏龍百出，醜聞多多，喺全球最佳航空公司排名榜中由冠軍跌到落第三，已經夠醜喇，家陣連最基本嘅客機食水都靠唔住，問你怕未。
係咁嘅，國泰十四班客機食水驗出含菌量超標，甚至有大腸菌群，搞到乘客唔止要改用樽裝水，連用洗手間嘅水漱口都唔得。醫學界人士指出，大腸菌群可能來自環境或動物糞便，顯示有衞生風險。冇錯嘞，食水含大腸菌群可大可小，隨時可引起腸胃炎、屙血，嚴重嘅可以致命添，加上近排新沙士病毒肆虐，乘客唔驚就假。
最弊係國泰管理唔掂，連危機應變都搞到一鑊泡。呢，兩周前該公司已驗到食水有問題，但居然延到本周二至通報機管局，衞生署更遲至周三下午至知悉，而一般乘客更一無所知，機場登記櫃位既冇相關通告，職員亦無通知食水有問題，好多人要睇新聞至知，你話國泰唔係有心隱瞞都冇人信喇。
唔怪得有乘客直言，如果國泰服務質素再冇改善，下次旅行會考慮選擇其他航空公司。咁又係吖，唔好講服務質素唔掂呢筆，淨係聽到「糞便食水」都令人惡心喇。難為國泰仲死撐，聲稱只有部分飲用水樣本唔符合「內部高標準」喎。計功夫茶話齋，國泰連最基本嘅管理及服務水平都達唔到，所謂內部高標準，根本就係自欺欺人，家陣大把航空公司選擇，國泰不斷趕客，只會自拆招牌咋。
講起國泰嘅醜聞，真係一匹布咁長，尤其係沒完沒了嘅工潮更加令人討厭。次次都係勞資雙方各執一詞，公說公有理，婆說婆有理，誰是誰非根本講唔清，唯一可以肯定嘅就係國泰管理出咗問題。正所謂，物必先腐而後蟲生，如果唔係管理混亂，又點會搞成咁吖。
想當年，國泰以優質服務享譽國際，先後四次摘下全球最佳航空公司桂冠，可惜隨着近年服務質素每況愈下，連國際排名都保唔住，公司固然丟架，香港形象亦受到影響。呢，曾經八次榮膺全球最佳機場殊榮嘅香港赤鱲角國際機場，近年竟然三甲不入，認真失禮。
見微知著，曾經令港人引以為傲嘅航空公司同國際機場，近年雙雙走下坡，正正係香港不斷沉淪嘅縮影，亞洲航空樞紐逐漸失去吸引力，一次又一次被其他地區超越，講起真係可悲。根據梅菲定律，但凡有可能出錯嘅一定會出錯。國泰再唔諗辦法改善管理，提升服務質素，醜聞仲會陸續有來，今次係糞便食水，下次又有乜嘢「新猷」呢？