唔知係咪因為古裝劇中經常出現老爺、大爺等稱謂，所以每次聽到「爺」字總會以為係男人，只係呢個諗法用喺霜爺身上就錯晒。皆因佢唔係男人之餘，更係一位外形亮麗兼身材火辣嘅內地嫩模。咁點解又會得到呢個咁男性化嘅名呢？
呢位嚟自湖北宜昌，今年21歲嘅嫩模霜爺，仲擁有CyberJelly霜爺嘅暱稱，如果冇睇過佢嘅寫真集，真係以為佢係一位男人，又點諗得到佢係喺去年12月底先至出道嘅新進模特兒呢？去年出道嘅佢雖然資料並唔多，但呢點一啲都冇影響到佢喺大家心目中嘅印象，事關佢嘅外形同性格，都極具個人特色。先講佢嘅外形，有別於內地流行嘅大眼模特兒，佢一對眼細得嚟卻畀到人一種冷艷及堅強嘅感覺，令人一見難忘兼易認。此外，佢嘅性格亦係相當堅強，而呢點可以從佢微博中嘅座右銘睇到。「你不放棄的心比鑽石更珍貴，沒有無法達成的目標，沒有遙不可及的夢想，活出精彩活出自己」，呢啲說話充分展現出佢對模特兒工作嘅堅持，亦睇得出佢嘅性格正如佢嘅眼神一樣，流露出果敢嘅一面。
據講佢之所以培養出呢種性格，除咗因為成長環境，迫使佢要獨立之外，亦同佢成為模特兒之前嘅工作有關。喺未入行前，本身係位眼鏡銷售員嘅佢起初相當怕醜，每當面對客人時總係唔敢出聲，只係經過一番日子浸淫後，練就出佢今時敢作敢為，以及重情重義嘅個性，而霜爺嘅外號亦喺呢個時候得嚟。出道以後，憑住一輯又一輯嘅性感兼主題大膽嘅寫真，令佢嘅人氣不斷攀升，尤其喺今年1月中推出嘅綑綁寫真，不但成為網民嘅話題，更令佢嘅人氣更上一層樓。不過唔講唔知，畢業於武漢音樂學院嘅佢音樂造詣亦相當唔錯，此外佢亦係一位Cosplay常客，經常化身唔同嘅動漫人物，喺各種動漫同電玩展中亮相。睇嚟呢位火辣女郎不但喺鏡頭前充滿魔力，佢嘅潛能更係有待大家發掘。
霜爺呢個名字雖然男性化，但正正係呢個咁有個性嘅名字，先至可以反映出佢嘅真個性。當然，大家喺留意佢嘅性格同時，令人心跳加速嘅火辣身材，以及極為性感嘅寫真同樣唔可以錯過。
網址：www.weibo.com/nananiang
出生地：湖北宜昌
身高：165cm
三圍：34、24、34
撰文：魂