政情：AV仁拖「辭」 泛民勢走數
民主黨（白鴿黨）「超級區議員」何俊仁（AV仁）今年一月宣布會喺政改方案否決之後發動辭職變相公投，政改上周已經否決咗，連退出公民黨（公文袋）嘅湯家驊都已經辭咗立法會議員職務，但AV仁遲遲未有行動，預咗佢想縮沙唔玩。泛民尋日又再召開多方平台會議，白鴿黨單仲偕會後話，團體對搞唔搞公投有原則性分歧，要拖到七月三日先開最後一次會，做最終決定。
公文袋呻窮 學界想話事
據知會上社民連同學民思潮堅持搞辭職公投，但學聯一早講咗負擔唔到。公文袋因為湯家驊辭職而變得複雜，如果該黨要參加新界東補選，資金會有好大困難，其他黨亦唔見得多錢，睇嚟今次公投都係「煲無米粥」收場。學界亦都對於公投題目好有意見，之前明明講好用重啟政改五部曲做題目，但有學生團體要求改用修改《基本法》做題目，單仲偕已排除呢個可能性。梗係啦，之前白鴿黨劉慧卿已講明唔支持修改《基本法》嘛，況且白鴿黨搞辭職公投，點到學界話事呢？