政情：智將或垃圾 WhatsApp揭發
心理學有種理論，就係當一個人處於私密環境下，會比較表現真我。從今次建制派WhatsApp群組資料外洩後，從對話內容都反映到建制派嘅權力分布版圖，亦清楚知道邊啲議員係真正有能力。究竟邊個係真正建制派大佬負責統領，邊啲人心水清出謀獻策，邊啲人只負責做啦啦隊搖旗吶喊，邊啲係港區人大代表口中嘅垃圾中之垃圾，我哋再次為大家嚟個WhatsApp對話內容大拆解。
鍾樹根冷靜獻計
今次對話內容可以睇到民建聯（民記）內部真正「當家」，仍然係前主席譚耀宗及葉國謙，兩人不時發號司令，遙控建制派集體行動；聲稱中立嘅立法會主席曾鈺成屢次出手，可見佢嘅監察及指揮角色不容忽視。令人刮目相看反而係鍾樹根及陳鑑林，前者平時經常講錯嘢，後者悶聲發大財，但兩人今次都有做智囊獻計，特別係樹根喺對話過程中有着冷靜嘅分析，甚至質疑葉國謙嘅決定。
李慧琼全程「失聲」
至於其他民記中人呢？蔣麗芸分別講「黃毓民到」、「黃碧雲在前廳」、「宴會廳無泛民」幾句，似乎佢專責做狗仔隊，睇實泛民一舉一動。反而做咗十幾年議員嘅黃定光，經常在群組內「每事問」，先問發言時間幾多分鐘，之後又問下一步有咩行動，好似唔知發生緊乜事咁。最令人失望可以話係民記主席李慧琼，咁重要關頭，竟然一句聲都無出過，如果佢錫身到咁，真係可有可無。
「思」慮周全識拖延
不過，建制派之中都有一名智將，今次揭露原來係旅遊界姚思榮，平時粒聲唔出嘅佢，竟然識得建議將表決時間拖至第二日朝早，又識叫大家預留發言人數，等泛民提出中止待續議案後，建制派可繼續控制結束時間。工聯會主要做啦啦隊打氣，如黃國健及陳婉嫻叫大家冷靜、留力，好少留言嘅麥美娟第一時間安慰主動道歉嘅保險界陳健波，算係有情有義。
外界以為自由黨無出過聲，咁就錯晒嘞，據統計當日表決前後嘅「甩轆六小時」，其實該黨有一位議員發言，就係航運交通界易志明，但佢只係出過「小弟可發言」，證明該黨同建制派關係幾咁疏離。發言最短嘅建制派議員係工業界梁君彥，佢喺朝早九點幾彈咗一個「忍」字，叫大家忍咩呢？最後當然不得不提地產及建造界議員石禮謙嗰句經典嘅「團結日係我哋嘅力量」，連佢都話寫錯咗，種種嘢加埋一齊，難怪有港區人大批評建制派議員係無承擔嘅垃圾喇！