中環出更：睇「好戲」 食花生 「鍾」惹痱滋
一場政改甩轆騷，造就自由黨仝人由建制派「壞孩子」洗底，就連中聯辦前晚召見建制派飲夜茶，該黨自覺好光榮，原來壞孩子間唔中盡本分投票都可以好似立咗大功咁。該黨主席鍾國斌（Felix）仲話，當晚夜茶除咗點心，仲有花生食，但就好後悔夜茶食花生食到第二日生痱滋喎，真係自己攞嚟。該黨成晚「食住花生睇好戲」，事後仲咁風騷，真係唔知攞景定贈興。
快閃晤CY 氣氛唔錯
連日風波由WhatsApp而起，醒目嘅泛民主派即刻轉用另一通訊程式Telegram避風頭。不過，Felix話建制派冇因為洩密而轉用其他應用程式溝通，話始終四十幾個議員，逐個講好困難，所以會繼續用「肇事」群組溝通，但相信短期內大家說話會小心好多，因為仲未捉到「鬼」喎。
講番自由黨四名議員尋日應邀同特首梁振英（CY）會面，但會面僅約半小時就閃電結束，唔通壞孩子又同人哋不歡而散？Felix會後話氣氛唔錯，仲引述CY建議雙方會面應該恒常化，該黨都認同呢個安排。至於關係可唔可以長久，暫時仍好似會面時唯一提供嘅水，君子之交淡如水囉。
卓妮