中環出更：港青籌款宴 濟尼震災
香港喺最新公布嘅全球幸福感排名好低，但無可否認，香港人確實好幸福。香港青年服務領袖獎獎勵計劃（獎勵計劃）創辦人黃仰芳（Fonia）及聯席創辦人林月萍（Moray），早前就帶領一班香港青年到尼泊爾探訪基層學生及孤兒，點知結束探訪回港後，尼泊爾即發生造成約八千人死亡嘅大地震。為咗籌款幫助尼泊爾災民，日前佢哋舉行一場分享晚宴，由兩名親身經歷尼國地震嘅港青細訴見聞。
去年獎勵計劃喺十三個制服團體中，評選出十三位青年服務領袖獎得主，今年四月Fonia及Moray就帶領一班後生仔去尼泊爾展開服務之旅。Fonia話，佢哋返港後尼國即發生地震，但兩位港青周廣傳及趙浩霖就留低多幾日，點知就目睹地震摧毀家園嘅一幕。
鄭家成嘆港人好幸福
新世界集團創辦人鄭裕彤次子兼周大福慈善基金理事長鄭家成都有現身分享會，佢話香港人好幸福，至少有瓦遮頭，尼泊爾災民就冇咁幸運，所以呼籲大家慷慨解囊。佢又盛讚獎勵計劃挑選出有心嘅青年領袖喺本港及海外做服務，十分有意義，所以佢會再支持第二屆計劃。
身兼香港潮州商會會董嘅晉豪洋行董事余秋偉（Edward）亦有到場，潮州人做生意好叻，Edward最近睇中高質素嘅珠寶首飾市場，但佢唔係行傳統零售路線，而係用結合展銷零售及網絡銷售方式，相信可以搵到商機。
卓妮