係人都知，內地係造假王國，除咗騙子之外乜都有山寨貨。其實，天下奸商一樣黑，造假並唔係內地嘅專利，有香港無良藥廠青出於藍勝於藍，喺內地製造假藥，唔單止行銷中港兩地，仲開拓埋外國市場，真係唔到你唔服。
唔係亂噏o架。東莞警方近日破獲一間港人為主腦嘅製造香港冒牌藥集團，拘捕數十人，起獲各類假冒藥品超過一百萬瓶，淨係原料都超過一百三十噸。被假冒嘅藥物當中，有唔少係香港著名中成藥品牌，銷售網絡覆蓋全國六個省份、十幾個地市，連香港及印尼等地區及國家都中招。
最得人驚嘅係，呢啲冒牌藥包裝精美，連防偽標識都抄到十足十，一般消費者根本無法分辨。加上假藥摻雜大量副作用極大嘅受管制特效藥，好多服用者誤以為療效顯著，隨時加重病情，救命變奪命，弄巧反拙。正如有專家話齋，其中一種特效藥可導致糖尿病、青光眼同白內障，另一種長期服用更可以致命，絕對唔係講玩o架。
冒牌藥之所以賣通街，國產官僚把關甩漏，絕對難辭其咎。原來集團主腦○四年已經開始喺深圳設廠，一一年轉戰東莞及河源等地，為禍長達十一年，內地警方一直闊佬懶理，關人個關，簡直係累人累物。今次好彩有被炒魷魚嘅員工踢爆咋，如果唔係，都唔知仲有幾多消費者受害呀。
話時話，內地黑心藥多如牛毛，禁之不絕，今次事件只係冰山一角咋。世衞組織估計，中國係目前全球最大嘅假藥集散地，內地公安部門前年一次掃蕩假藥行動，就破獲一千二百多宗案件，涉及廿九個省市，貨值超過二十億元人民幣。冇計喇，內地當局有法不依，執法不嚴，製售假藥話就話最高可判死刑，實際上往往罰款了事，同變相鼓勵犯法冇乜分別嘅咋。
當然喇，國產官僚敷衍塞責，胡混度日，港產官僚都唔好得幾多。冒牌藥長期流入本港，港府例牌後知後覺，如果唔係內地拉人封舖，港府依家可能仲係矇查查。其實，莫講話內地假藥長驅直入，即使攞正牌嘅本港大藥廠一樣出事，幾年前搞到人心惶惶嘅發霉藥事件，就係最佳例子。衞生官僚渾渾噩噩，旨意佢哋把關，盞嘥氣嘅咋。
一句講晒，嘢唔可以亂食，藥唔可以亂用。製造其他冒牌產品已經罪無可恕，製造假藥更加罪大惡極，藥物本來係治病救人，家陣變成謀財害命，你話呢啲奸商係咪應該受到嚴懲吖？治亂世，用重典，對奸商仁慈，即係對市民殘忍，唔該當局認真把關，做好自己份工喇！